Բլոգի մեր նախորդ հրապարակումներում արդեն անդրադարձել ենք գումար խնայելու վերաբերյալ հետևյալ հարցերին՝ ինչո՞ւ խնայել և որո՞նք ենք խնայելու թակարդները: Այսօրվա թեման է ինչպե՞ս խնայել: Ֆինանսական գրագիտության ճանապարհին սա քո փոքրիկ ուղեցույցն է:
Ինչպե՞ս խնայել գումար
Փակեք վարկերը, պարտքերը
Երբ ունեք պարտքեր, Ձեր «խիղճը հանգիստ չի լինի»: Ամենայն հավանականությամբ կմտածեք, որ գումար հավաքելու փոխարեն ավելի ճիշտ կլիներ վարկերը փակել: Եվ դա իհարկե ճիշտ որոշում է: Եթե ունեք վարկեր կամ պարտքեր փորձեք առաջինը դա փակել և «հանգիստ խղճով» սկսել հավաքելը:
Հետաձգեք գնումը
Ենթադրենք խանութում տեսել եք Ձեր հավանած հագուստը կամ իրը: Եթե շատ մեծ է ցանկությունը այդ պահին գնելու, գնացեք տուն, տվեք Ձեզ մի քանի օր ժամանակ: Մտածեք, եթե այդ իրը ունենաք ինչ կփոխվի Ձեր կյանքում կամ ինչ կավելանա: Արդյոք հենց հիմա, հենց այս պայշհին Դուք ունեք դրա անհրաժեշտությունը, թե ոչ: Եթե զգում եք, որ առանց այդ իրն ունենալու էլ կարող եք հանգիստ ապրել, ուրեմն հետաձգեք այն կամ մի գնեք, իսկ գումարը ուղարկեք խնայողությունների արկղիկ:
Եկամուտներից 10%, 20%, 30% թե՞ 2% խնայել
Տարածված կարծիք կա, որ պետք է յուրաքանչյուրը իր եկամուտի 10 տոկոսը պարտադիր ուղարկի խնայատուփ: Իսկ ինչ, եթե մարդը չունի այդ հնարավորությունը: Այս դեպքում անհրաժեշտ է չխնայե՞լ: Իհա՛րկե, ոչ: Մի՛ դրեք Ձեր առջև սահմանափակումներ, սկսեք խնայել այնքան տոկոս, որքանը կարող եք: Օրինակ, սկսեք 2%-ից: Հետագայում կարող եք կամաց-կամաց ավելացնել՝ 3%, 4%, 5%...: Խնայողություն անելու մեջ կարևորը կարգապահությունն է, մի մոռացեք, որ խնայողություն կատարելու եք ամեն եկամուտից:
Ձեր նախընտրելի բանկում բացեք խնայողական հաշիվ
Եթե ինքներդ մոռացկոտ եք կամ չունեք ժամանակ խնայողությունների մասին մտախել, բանկում բացեք հաշիվ, և նշեք, թե Ձեր եկամուտից որքանը ամեն ամիս փոխանցվի այդ հաշվեհամարին:
Հավաքեք գումար՝ կլորացնելով հաշիվը
Ենթադրենք գնացել եք խանութ և վճարել 7440 դրամ: Ձեր խնայատուփ կարող եք ուղարկել 60 դրամ կամ 560 դրամը: Եվ ամեն անգամ որևէ տեղ վճարում կատարելիս փորձեք կլորացնել հաշիվը և մնացորդը ուղարկել Ձեր խնայատուփ: Այսպիսի մանր քայլերով տարեվերջին կարող եք բավական գումար խնայել:
Գումար խնայելու որոշման համար անհրաժեշտ է մոտիվացիա, բայց մոտիվացիան անցնում է, իսկ գումարն իսկապես խնայելու համար անհրաժեշտ է կարգապահություն, հստակ գրաֆիկ և գրաֆիկից մինիմալ շեղումներ:
Տե՛ս նաև Ինչո՞ւ խնայել գումարը, գումար խնայելու թակարդները, պլանավորում ենք բյուջեն
