Երբեմն ֆինանսը կարող է ազդել մեր կյանքի որակի, ինքնագնահատականի վրա: Առանձնացրել ենք մի քանի կետեր, որոնք, հնարավոր է, Ձեզ խանգարում են վաստակել գումար: Այս կետերը վկայում են, որ ունեք անառողջ հարաբերություններ գումարի հետ:
Դուք կարծում եք, որ գումարը վատ բան է
Օրինակ՝ հաճախ լսել եք, որ «Ազնիվ, արդար քրտինքով հարուստ լինել չես կարող», «Երջանկությունը գումարի մեջ չէ/ գումարով երջանկություն չես գնի»: «Մեծ գումարը մեծ խնդիրներ է ստեղծում»:
Այս արտահայտությունները սահմանափակում են միտքը: Մարդու ուղեղում հենց այս կարգավորումներն են, որ թույլ չեն տալիս վաստակել շատ գումար: Չէ՞ որ շատ վաստակելը ամոթ է: Միևնույն է, շատ գումարը Ձեզ համար չէ, քանի որ ընտանիքում ոչ ոք շատ չի վաստակել: Հնարավոր է՝ «ամաչեք» աշխատավարձի բարձրացում խնդրել, քանի որ անհանգստանում եք, որ Ձեր մասին վատը կմտածեն: Կկարծեն՝ ագահ եք և միայն գումարի մասին եք մտածում: Վախենում եք, որ շատ վաստակելու դեպքում կախում կունենաք գումարից, կդառնաք վատ մարդ և շատ խնդիրներ կունենաք, որոնք նախկինում չեք ունեցել, օրինակ կսկսեք օգտագործել թմրանյութեր կամ խաղադրույքներ կիրականացնեք տարբեր կայքերում:
Եթե շատ վաստակեք, ազնիվ ընկերներ չեք ունենա, բոլորը կշփվեն Ձեզ հետ շահի համար
Հայկական իրականության մեջ ֆիլմերում նաև մեծահասակների խոսույթում հաճախ է հանդիպում նման արտահայտությունները: Բայց արդյոք մի՞շտ է դա այդպես: Մարդիկ տարբեր են: Իրադարձություններն ու դեպքերը նույնպես: Ընդհանրացումները միշտ չէ, որ տեղին են:
Համեմատում եք Ձեր վաստակած գումարը ուրիշի վաստակածի հետ
Անդադար նայում եք ուրիշներին՝ տեսնելու, թե ով որքան գումար վաստակեց, որտեղ ծախսեց և ուր գնաց հանգստանալու: Մրցակցում եք հարևանի, գործընկերոջ, բարեկամի հետ: Ով գնաց թանկարժեք ռեստորան կամ ինչ նվեր պատրաստեց կնոջ կամ երեխայի ծննդյան օրը: Համեմատվելը ուրիշի հետ չափազանց վտանգավոր «զբաղմունք է»: Առաջին հայացքից թվում է՝ Դուք տեսնում եք դիմացինի հաջողությունները, ոգևորվում և սկսում Դուք էլ շատ վաստակել: Իրականում, հակառակ գործընթացն է տեղի ունենում: Սկսում է ընկնել ինքնագնահատականը, փնտրում եք և հաճախ գտնում մեղավորների: Ընկնում է աշխատունակությունը: Արդյունքը՝ հայտնվում եք համեմատելու, մեղադրելու և ցածր ինքնագնահատականի անվերջ շրջապտույտի մեջ: Ամեն մեկն ունի իր ֆինանսական պատմությունը։ Պետք է կենտրոնանաք ձեր վրա և չփորձեք համեմատել ձեր եկամուտը շրջապատի մարդկանց հետ։
տե՛ս նաև 5 խորհուրդ, եթե որոշել եք վարկ վերցնել
Money guru ֆինանսական բլոգի էջում կարող եք կարդալ ֆինանսական գրագիտության մասին ճանաչողական և տեղեկատվական նյութեր, որոնք կօգնեն Ձեզ ավելի ճիշտ կարգավորել Ձեր ֆինանսները, ունենալ առողջ հարաբերություններ գումարի հետ: Մեր մյուս հոդվածներում կշարունակենք այս թեման:
