Ցանկանում եք գումար խնայել, բայց այդպես էլ չի հաջողվում: Մասնագետներն արդեն առանձնացրել են մի քանի թակարդներ, որոնցում հայտնվում է մարդը, երբ որոշում է գումար խնայել, եկեք բացահայտենք, թե որոնք են դրանք:
1.Ցածր աշխատավարձ
Շատերի կարծիքով ցանկացած աշխատավարձից կարելի է խնայողություն անել, բայց եկեք հանենք վարդագույն ակնոցը և նայենք իրականությանը: Երբեմն մարդը աշխատում է այնքան գումար, որ հազիվ բավականացնում է կարևոր ծախսերին, այս դեպքում գումար խնայելը դառնում է դժվար, եթե ոչ անհնարին: Սակայն, սա բավական «լավ արդարացում է» այն մարդկանց համար, ովքեր ժամանակ չեն տրամադրում և չեն ուսումնասիրում իրենց ֆինանսը՝ որքան են վաստակել, որտեղ են ծախսել: Հնարավոր է ուսումնասիրելու արդյունքում գտնվեն այնպիսի ծախսեր, որոնք կարելի է շրջանցել:
Եթե ունեք վնասակար սովորություններ, օրինակ՝ ծխել, ուրեմն գումար հավաքելը կարող է լավ մոտիվացիա դառնալ այլևս չծխելու և այդ գումարը հավաքելու համար:
2.Չգիտենք՝ ինչպես խնայել
Դեռ փոքր տարիքից երեխային սովորեցնում ենք տառերը, գումարել-հանել թվերը, աշխարհի բոլոր երկրների մայրաքաղաքները անգիր անել: Ֆինանսական գրագիտությունը հանգիստ շրջանցում ենք: Մտածում, որ դա տարիքի հետ «կգա»: Երեխան մեծանում է, դառնում հասուն և գումարները տեղի-անտեղի վատնում կամ խրվում ահռելի պարտքերի մեջ: Այս դեպքում արժե անցնել ֆինանսական գրագիտության դասընթացներ կամ կարդալ մեր բլոգը և լինել տեղեկացված ))):
3. Չկա նպատակ
Ամեն բան այս կյանքում դառնում է դժվար, անհասկանալի և առաջանում է դիմադրություն, երբ չգիտենք՝ ինչու ենք հավաքում գումար: Չէ որ գումար հավաքել, նշանակում է նաև մեզ զրկել որոշակի վայելքներից, սիրելի զբաղմուքներից ու հաճույքներից: Իսկ ինչո՞ւ, ո՞ւմ համար: Նախքան գումար հավաքելը հստակեցրեք, թե ինչու: Միգուցե, ցանկանում եք արտերկրում սովորել, արձակուրդ վայելել, կամ ուղղակի ունենալ ֆինանսական ապահովության բարձիկ՝ անկանխատեսելի իրավիճակների համար:
4. Խիստ պահանջներ
Եթե խնայում եք Ձեր առջև դնելով խիստ սահմանափակումներ, մի օր հաստատ Ձեր նյարդերը տեղի կտան: Գումար հավաքելուն զուգահեռ մի մոռացեք սիրելի զբաղմուքների, ժամանցի, Ձեզ ուրախացնող գնումների մասին: Գումար հավաքելը նման է ձեռքում պահած ավազի, որքան ամուր ես բռնում, այնքան արագ կորցնում ես ավազները:
5. Վատ սովորություններ և բացասական վերաբերմունք
«Միևնույնն է հավաքծդ գումարը չնչին է, ոչինչ չես կարող անել»
«Վատ ենք ապրել, վատ էլ ապրելու ենք, ինչը կփոխվի»
«Հեշտ վաստակածը, հեշտ էլ կծախսվի»
«Մեկ անգամ ենք ապրում, վաղը մեռնել կա»
Այս և այլ շատ արտահայտություններ, որոնք հաճախ լսել և լսում ենք մեր ծնողներից, շրջապատից և մեզ համար հեղինակություն ունեցող մարդկանցից, կարող են դառնալ այն արգելքը, որը կդժվարացնի մեր նպատակին հասնելու ուղին: Ներքին պատկերացումները, վերաբերմունքը, համոզմունքներն ու մտքերը փոխելով՝ կարող ենք փոխել մեր վարքը, թույլ տալ մեզ հասնել մեր նպատակներին, ավելի խելացի և դյուրին խնայել գումար:
money guru-ն ֆինանսկան գրագիտության աշխարհում քո լավագույն ուղեցույցն է:
