Ինեկոբանկը չի իրականացնում վարկի առցանց չեղարկման գործընթացներ

Տեղեկացնում ենք, որ Ինեկոբանկը չի իրականացնում վարկի առցանց չեղարկման գործընթացներ հեռախոսազանգի կամ InecoOnline/InecoMobile և sprint համակարգերի միջոցով։ Նման հնարավորությունից օգտվելու բոլոր առաջարկները հուշում են զեղծարարության փորձի մասին։

Վերջին շրջանում լայն տարածում է ստացել զեղծարարության նոր սխեմա: Ձեր ուշադրությանն ենք ներկայացնում այն և դրանից խուսափելու համար որոշ անվտանգության կանոններ։

Զեղծարարները կարող են կապ հաստատել Ձեզ հետ Բանկի հեռախոսահամարին նույնանման հեռախոսահամարից (օրինակ՝ 055-510-510), ներկայանալ որպես Բանկի աշխատակից և հայտնել, որ Ձեր անվամբ ձևակերպվել են վարկեր, որոնց չեղարկման նպատակով ուղարկում են հղում (SMS հաղորդագրության, Whatsapp, Viber, Telegram և/կամ այլ հարթակների միջոցով)։ Այնուհետև, զեղծարարներն ուղղորդում են նշված հղման միջոցով մուտք գործել Ձեր InecoOnline/InecoMobile/sprint համակարգ և ինքնուրույն չեղարկել վարկերը։
Ուշադրությո՛ւն․ Հաղորդագրության միջոցով ստացված հղումը վերահասցեավորում է կեղծ կայք, որը, թեև կարող է արտաքնապես նման լինել, սակայն որևէ առնչություն չունի Բանկի InecoOnline/InecoMobile/sprint համակարգերի հետ։
Կեղծ կայքում մուտքագրելով Ձեր մուտքային անունը և գաղտնաբառը, հնարավորություն կընձեռեք զեղծարարներին մուտք գործել Ձեր իրական InecoOnline/InecoMobile/sprint համակարգեր և տնօրինել Ձեր ֆինանսական միջոցները, այդ թվում՝ ձևակերպել վարկեր Ձեր անունից և յուրացնել ստացված վարկային միջոցները։
Նկարագրված զեղծարարությունից խուսափելու համար անհրաժեշտ է՝

Նման բովանդակությամբ հեռախոսազանգ ստանալու դեպքում հրաժարվել ենթադրյալ «վարկի չեղարկման» գործընթացից։
Զգոն լինել և բացառել՝
Ձեր մուտքային անվան և գաղտնաբառի մուտքագրումը կեղծ կայքերում,
Ձեզ ուղարկված ծածկագրերի/կոդերի տրամադրումը զանգահարող անձին, անգամ եթե վերջինս ներկայացել է որպես Բանկի աշխատակից։

InecoOnline կամ sprint համակարգ մուտք գործելիս ուշադիր լինել կայքի հասցեի անվանմանը։ Բանկի հեռակառավարման համակարգերի հասցեներն են՝
InecoOnline համակարգ՝ online.inecobank.am
Sprint համակարգ՝ https://www.sprintonline.am/

Վերոնշյալ հասցեներից տարբերվող ցանկացած այլ անվանմամբ կայքի հասցե կեղծ է։

Եթե կարծում եք, որ դարձել եք զեղծարարության զոհ, զեղծարարի հետ հաղորդակցման ընթացքում տրամադրել կամ մուտքագրել եք Ձեր մուտքային անունը, գաղտնաբառը և/կամ Ձեր հեռախոսահամարին ուղարկված անվտանգության ծածկագրերը, խնդրում ենք անհապաղ կապ հաստատել Բանկի հետ հետևյալ ուղիներով՝ գրելով հաղորդագրություն InecoMobile համակարգի «Առցանց կապ» բաժնի միջոցով,
զանգահարելով Բանկի շուրջօրյա գործող՝ +374 10 510 510 հեռախոսահամարով

Ձեր անվտանգությունը մեզ համար բացարձակ առաջնահերթություն է։ Ցանկացած կասկածելի հարցման/հեռախոսազանգի դեպքում խնդրում ենք կապ հաստատել Բանկի հետ, ինչը հնարավորություն կտա Բանկին անմիջապես քայլեր ձեռնարկել զեղծարարության դեմ։

Եղեք տեղեկացված և պաշտպանված։